Канон Преподобному Сергию Радонежскому

 

Тропарь, глас 4-й

Иже добродетелей подвижник, яко истинный воин Христа Бога, на страсти вельми подвизался еси в жизни временней, в пениих, бдениих же и пощениих образ быв твоим учеником: темже и вселися в тя Пресвятый Дух, Егоже действием светло украшен еси: но яко имея дерзновение ко Святей Троице, поминай стадо, еже собрал еси мудре, и не забуди, якоже обещался еси, посещая чад твоих, Сергие Преподобне, отче наш.

Ин тропарь, глас 8-й

От юности восприял еси Христа в души твоей, Преподобне, и паче всего возжелел еси мирскаго мятежа уклонитися: мужески в пустыню вселился еси, и чада послушания в ней, плоды смирения возрастил еси. Тем быв Троице вселение, чудесы твоими всех просветил еси, приходящих к тебе с верою, и исцеления всем подая обильно. Отче наш Сергие, моли Христа Бога, да спасет души наша.

Ин тропарь, глас 8-й

В чистоте жития источник слез твоих, исповедания трудовныя поты совокупил еси, и купель духовную источил еси, священный Сергие, Преподобне, омываеши сугубстве творящим любовию память твою, скверны обоямо душевныя и телесныя. Сих ради, чада твоя суще, вопием ти: моли отче, Святую Троицу о душах наших.

 

Канон. Глас 8-й:

Песнь 1

Ирмос: Колесницегонителя фараоня погрузи чудотворяй иногда Моисейский жезл, крестообразно поразив, и разделив море, Израиля же беглеца, пешеходца, спасе, песнь Богови воспевающа.

Припев: Преподобне наш отче Сергие, моли Бога о нас.

Христа нас ради волею смирившагося, даже до рабия образа подражав, возлюбил еси смирение, и зельным бдением и молитвами, душегубныя страсти умертвив, на гору безстрастия возшел еси, Сергие пребогате.

Преподобне наш отче Сергие, моли Бога о нас.

Яко светильник света, твою душу слезными потоки украшая, и другаго Исаака подобно сам себе вознесл еси, Преподобне, и сердце твое Богу пожерл еси.

Слава: Иже во чреве матерни трикраты проглашением, Троицы служитель показался еси, и Трисолнечным светом озаряемь, демонская ополчения яко паучину разорил еси, преблаженне Сергие.

И ныне: Законов кроме естественных родила еси Законодавца Бога и Человека бывша, Того яко блага моли, Всенепорочная, наша беззакония презрети, вопиющих всегда: поим Господу, славно бо прославися.

 

Песнь 3

Ирмос: Утверждей в начале Небеси разумом и землю на водах основавый, на камени мя, Христе, заповедей Твоих утверди, яко несть свят, паче Тебе, Едине Человеколюбче.

Преподобне наш отче Сергие, моли Бога о нас.

Благих образ тебе дав твоим учеником, и привлек еси многи души во спасение, отлучившихся земнаго пристрастия, иже утешения улучиша райскаго наслаждения.

Преподобне наш отче Сергие, моли Бога о нас.

Яко доброплодная маслина в дому Божии, блаженне, процвел еси, и елеем умащая души, любовию тя поющих, преблаженне Сергие, и верою Христу вопиющих: несть свят паче Тебе, Человеколюбче.

Слава: Страсти душетленныя успил еси бодренными бдении, блаженне: и сих ради в чертог небесный вселился еси, прием Богомудре Сергие, благодать исцелений.

И ныне: Херувимов и Серафимов превышши явилася еси, Богородице: Ты бо едина прияла еси невместимаго Бога во чреве Твоем, нескверная. Темже Тя вси вернии песньми, Чистая, ублажаем.

Господи, помилуй (трижды).

Седален, глас 4-й

Яко воистинну тленных оставив нестоянное, Христу от души последовал еси, и болезньми и труды и зельным воздержанием, яко безплотен пожив, преблаженне Сергие: моли Христа Бога, спастися душам нашим.

Слава, и ныне: Херувимов и Серафимов превышши еси Богородице, небесе же и земли пространнейши, видимыя твари и невидимыя явилася еси преимущи несосудным сосуждением: Егоже бо пространствия небеса не вмещают, в Твоей утробе вместила еси, Чистая, Егоже моли, спастися рабом Твоим.

 

Песнь 4

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче.

Преподобне наш отче Сергие, моли Бога о нас.

Духа Пресвятаго храм, отче, был еси, и жизненных вод река исполняема, основание непоколебимо Церкве, монашествующих утверждение, Сергие досточудне.

Преподобне наш отче Сергие, моли Бога о нас.

Пророчески слезными каплями на всяк день постелю омочая, Сергие славне, дондеже до конца страстей пучину изсушил еси: темже память твою почитаем, присночестную и священную.

Слава: Лице Христово лицем, Преподобне Сергие, зрети сподобился еси, зерцалом воистинну разрешшимся: сие бо и от мира отлучи тя к возлюбленному желанию.

И ныне: Очищение наших даруй неведений, яко безгрешен, и умири мир твой, Боже, молитвами Рождшия Тя.

 

Песнь 5

Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма окаяннаго? Но обрати мя, и к свету заповедей Твоих пути моя направи, молюся.

Преподобне наш отче Сергие, моли Бога о нас.

В пощениих непреклонен пребыл еси, мудре, и до отшествия своего храня сие опасно, имже сподобился еси яве нетленнаго блаженства.

Преподобне наш отче Сергие, моли Бога о нас.

Остр ум имея к Богу внимати, страсти душетленныя успил еси, отче, и снопы благоплодия пожал еси, питая благочестно восхваляющия тя, Преподобне отче Сергие.

Слава: Светло житие твое, Преподобне Сергие, и известно всем концем явися, и Божественныя доброты исполнено, молитвами же и пощеньми, и любовию, яже ко Христу Человеколюбцу.

И ныне: Тя стену имуще, и заступлением Твоим соблюдаеми, Твоею Божественною славою хвалящеся, Тя ублажаем: Ты бо, Пречистая, душам нашим источаеши веселие и радование.

 

Песнь 6

Ирмос: Очисти мя, Спасе, многа бо беззакония моя, и из глубины зол возведи, молюся, к Тебе бо возопих, и услыши мя, Боже спасения моего.

Преподобне наш отче Сергие, моли Бога о нас.

Память твою творящим священную, отче, не престай моля Избавителя, даровати согрешений оставление, и Небесное Царство восприяти. Идеже глас празднующих веселит вся.

Преподобне наш отче Сергие, моли Бога о нас.

О Христе укрепляемь, вся коварствия лукаваго, твердым умом, Сергие, якоже сеть расторгнул еси, и пресветло светило миру, отче, показался еси.

Слава: Светом Божественным осияем, и со Ангелы ныне на небесех водворяяся, поминай верою чтущих память твою, Преподобне Сергие приснопамятне.

И ныне: Возвысила еси воистинну падшее человеческое существо, Иже образом Божественным, и Отца равенством, видимым Сыном неизменным, Богомати, без семене во чреве поносивши.

Господи, помилуй (трижды). Слава и ныне:

Кондак, глас 8-й

Христовою любовию уязвився, Преподобне, и тому невозвратным желанием последовав, всякое наслаждение плотское возненавидел еси, и яко солнце отечеству твоему возсиял еси: тем и Христос даром чудес обогати тя. Поминай нас, чтущих пресветлую память твою, да зовем ти: радуйся, Сергие Богомудре.

Икос

Евангельский глас, отче, услышав, вся оставил еси плотская мудрования, богатство же и славу яко прах вменив, и на страсти яко безплотен подвизався, и безплотных ликостоянием, чести сподобился еси. Разума дарование приял еси, еже и подаждь в песнех поющим ти сице: радуйся, Сергие Преподобне и Богоносе, небесный человече, земный Ангеле. Радуйся, Духа Святаго обитель. Радуйся, молитвами Богоданен дар приемый. Радуйся, яко прежде рождения проглашением прославив Святую Троицу, Яже тя прослави в жизни сей и по смерти. Радуйся, целомудрия столпе, имже всяка страсть попрася. Радуйся, яко от младых ногтей последовал еси Христу. Радуйся, притекающим к тебе спасения ходатай. Радуйся, светильниче многосветлый, возведый ко Христу монахов множества. Радуйся, похвало отечеству твоему. Радуйся, пророчеством украшенный, во еже прорицати яко настоящая будущая. Радуйся, яко молитвами твоими сопротивнии побеждаются. Радуйся, православному воинству нашему похвала и утверждение. Егоже соблюди молитвами твоими от враг ненаветно, да зовем ти: радуйся, Сергие Богомудре.

 

Песнь 7

Ирмос: Божия снизхождения огнь устыдеся в Вавилоне иногда. Сего ради отроцы в пещи, радованною ногою, яко во цветнице ликующе пояху: благословен еси, Боже отец наших.

Преподобне наш отче Сергие, моли Бога о нас.

В пещи искушений разжжения Божественная благодать ороси тя, Преподобне, и многосветла Троическим желанием показа, зовуща: благословен Бог отец наших.

Преподобне наш отче Сергие, моли Бога о нас.

Мир преобидев, славне Сергие, на земли яко безплотен пожил еси, и ангельским ликостоянием сподобился еси. Тем тя верою почитаем, досточудне.

Слава: В пристанище тихое вшед, Богомудре, житейских плаваний отвергл еси, и волнующимся житейскими спасительное окормление был еси, воспевающим: благословен Бог отец наших.

И ныне: Жезл прорасте, Дево, из корене Иессеева всеблаженный плод, цвет носящи спасительный, верою Сыну Твоему вопиющим: отцев наших Боже благословен еси.

 

Песнь 8

Ирмос: Седмерицею пещь, халдейский мучитель Богочестивым неистовно разжже, силою же лучшею спасены, сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.

Преподобне наш отче Сергие, моли Бога о нас.

Светоносный твой праздник, преблаженне Сергие, исполни радости и веселия духовнаго, благоухания же и просвещения, тя имущим заступника и правило монашествующим.

Преподобне наш отче Сергие, моли Бога о нас.

Молитвою непрестанною к Богу востекл еси, и оттуду Трисолнечными сиянии озарился еси, на враги борения поставив, приводя постников соборы новым житием, Христу вопиющим: дети благословите, священницы воспойте, людие превозносите Его во веки.

Слава: В пощениих крепкое, в молитвах неленостное терпение в искушениях, Сергие, на земли показал еси, зовый: дети благословите, священницы воспойте, людие превозносите Его во веки.

И ныне: Богородительнице Чистая, души моея язвы греховныя и соблазны очисти, ко источником примешающи, яже из ребр Рождества Твоего, иже от них потекшим струям: к Тебе бо взываю, и к Тебе прибегаю, и Тя призываю, Богоблагодатную.

 

Песнь 9

Ирмос: Ужасеся о сем Небо, и земли удивишася концы, яко Бог явися человеком плотски и чрево Твое бысть пространнейшее Небес. Тем Тя, Богородицу, Ангелов и человек чиноначалия величают.

Преподобне наш отче Сергие, моли Бога о нас.

Светоявления духовнаго исполнен быв, Преподобне Сергие, светильник сияя издалеча явился еси, словесныя зари нам облистая, и Пребожественныя Троицы жилище показался еси.

Преподобне наш отче Сергие, моли Бога о нас.

Воистинну тя велика учителя, мудре Сергие, Российским странам Христос дарова, неложным правлением правяща отечество свое, и учения сладчайша меда изливающа: ихже яко от окрина и мы, вернии, почерпаем независтно.

Слава: Душетленныя страсти победив, яко пастырь истинный упасл еси словесное Христово стадо, еже выну благодатию Духа яко цветы райския питая, Преподобне.

И ныне: Псалмы Тя воспеваем, Обрадованная, и немолчно Ти, еже радуйся, вопием: Ты бо источила еси всем радование.

 

См. Молитвы Преподобному Сергию Радонежскому

См. Акафист Преподобному Сергию Радонежскому

См. Житие преподобного Сергия Радонежского